Warbixin dheer oo ku saabsan kulan yeesheen suxufiyiinta Soomaaliyeed ee ku dhaqan wadanka Holland
(Sawirada kulanka)

Waxaa maanta kulan ballaaran isugu yimid Xarunta Jaaliyadda Soomaalida ee magaalada Amesterdam ee wadanka Holland weriyeyaal Soomaaliyeed oo intooda badan soo gaaray Holland saddexdii sano ee ugu danbeeysay, waxaana kulankani uu ahaa midkii ugu horreeyey ee ay yeeshaan tiro intaa la'eg oo weriyeyaasha Soomaaliyeed ee soo gaaray wadan ka tirsan Yurub, waxaana kulankan soo abaabulay Weriye C/raxmaan Guurre Maxéd (Gentelman).

Suxufiyiinta kulanka ka soo qeybgashay oo ka socotay qeybaha warbaahinta Soomaalida ayaa ujeedada loo abaabulay ay aheyd sidii ay weriyeyaashu u kala war-qaadan lahaayeen, ayna xiriir joogta ah u yeelan lahaayeen, waxaana weriyeyaashii kulanka soo xaadiray ay si niyad-sami ah u muujiyeen walaaca ay ka qabaan xaaladda uu wadanku ku sugan yahay iyo tacadiyadda ka dhanka ah suxufiyiinta ay isku mihnada yihiin, iyo wax sidii ay saxaafaddu uga qeybqaadan laheyd badbaadinta dalka, dadka iyo Qaranimada, waxaana weriyeyaashu ay si taxadar leh u muujiyeen in saxaafadu qeyb ka tahay bulshada uu saaran yahay xilka badbaadinta wadanka, loogana baahan yahay suxufiyiinta in ay dhabaha u xaaraan sidii iyaga oo mideysan ay wax uun u qaban lahaayeen, iyadoo dhabaha waxqabadkaasi loo marayana uu noqoto wacyigelinta bulshada.

Kulankan oo ahaa kii ugu horreeyey ee ay isugu yimaadaan weriyeyaasha ayeey ugu horreyn ugu duceeyeen ummadda Soomaaliyeed inuu ILLAAHEY ka saaro dhibaatada joogtada ah, quluubtoodana burcad isu mariyo, iyadoo ay jireen weriyeyaal kulanka kaga qeybgalay qadka taleefanka oo aaney u suurtagelin in ay madasha shirka soo gaaray, waxaana weriyeyaasha qadka taleefanka uga qeybgalay ay kala ahaayeen Fardowsa Maxéd C/lla (Fardowsa Tina) oo ka mid aheyd weriyayaashii ka soo shaqeeyey Idaacadda iyo TV-ga Horn Afrik, Maxed Cusmaan (Ghadafi) oo ka soo shaqeeyey Idaacadda Radio Muqdisho, Agaasime-na ka soo noqday Frontie FM, haatanna ka mid ah howl-wadeenada Radio Dalmar iyo Cabdiraxmaan Suubiye oo ka soo shaqeeyey Idaacado ay ka mid yihiin Frontie FM Nairobi iyo Radio Banaadir iyo Maxéd Axmed Sandiir oo ahaa (Freelencer journalist) iyo milkiile website, waxaana suxufi kasta uu fursad u helay inuu soo jeediyo fikiriisa ku aadan sida ugu fudud ee saxafiyiinta Soomaalidaa ee ku wada sugan Holland isugu xirmi lahaayeen, iyaga oo wada ilaashanaya mihnadooda saxaafaddana ay wax u wada qabsan karaan.

Weriyeyaasha kulanka ka qeybgalay ayaa mid kastaba waxa uu cabiryey aragtidiisa, waxaana ku soo uruurinay khudbadahooda sidatan.

Cabdishakuur Cilmi Xasssan

In suxufiyiintu meel kasta oo ay joogaan ay ka gudbaan khilaafaadka dhexdooda ah, oo ay meel iska dhigaan kala qoqobnaanta, una soo jeestaan sidii ay uga qeybqaadan lahayeen nabadeynta wadanka iyo wacyigelinta bulshada.

In kulankan iyo kulamada kale ee xiga ay ka soo baxaan (team) weriyeyaal ah oo mideysan, isku aragtina ah, kana wada shaqeeya danta iyo maslaxada suxufiiyiinta Soomaalida meel kasta oo ay joogaan.

In weriyeyaasha kuwooda wax bartay ee ama heer dugsi hoose/dhexe/ama sare soo dhammeeyey ay heli karaan (waa haddii weriyeyaashu isku xirnaan muujiyaan) fursad waxbarasho oo heer jaamaceed ah haddii ay ka soo baxaan shuruudaha looga baahan yahay, si ay u soo baxaan jiil cusub oo la jaan-qaada horumarka casriga ah ee saxaafadda adduunka.

In aan mar walba iyo meel walba u istaagno u doodida xuquuqda saaxiibadeena suxufiyiinta ah ee ku dhibaateysan dalka iyo dibedda.

In aan lagu degdegin ku dhawaaqis urur, balse la magacaabo guddi isku soo uruuriya dhammaan weriyeyaasha Soomaaliyeed ee ku dhaqan Nederland, markaa kadibna ay weriyeyaashu ka shirayaan sida ay mihnadooda saxaafadeed uga sii wadan karaan halkan.

Daahir Cabdulle Calasow.

“Kulanka maanta wuxuu kalsooni gelinayaa weriye kasta oo ku sugan Nederland, oo garowsan in weriyeyaal Soomaaliyeed oo is kaashaday, isku dan ah, isku mihnad ah, ay aayahooda ka tashan karaan oo ay wax dhisan karaan, ilaa heerka ugu sareeya, maadaama ay wadan horumarsan joogaan ayna la jaanqaadi karaan saxaafada caalamiga ah, waxaana u soo jeedinayaa xubnaha kulanka maanta jooga in ay qorshaha ku darsadaan sidii gurmad biniáadanimo loo gaarsiin lahaa weriyeyaasha dhibaateysan ee ku sugan wadanka”

Fardowsa Maxéd Cabdulle (Qadka taleefanka)

Waan soo dhoweyneyso kulamada ay yeelanayaan weriyeyaasha, waana tallaabo wanaagsan oo yididiilo iyo farxad u horseedi karta weriyeyaasha ku sugan Holland, waxaan soo jeedinayaa in kulanka midka xiga aan goob joog ka noqon doono hadduu ALLE idmo, oo aan rajeynayo in kulankaasina ay soo xaadiraan saaxibada kale ee aaney u suurtagelin in ay madasha maanta soo gaaraan.

Saalax dheere.

Waa bilow fiican in maanta ay is arkaan wejiyo ay mar hore isugu danbeysay, waxaana ujeedada aan kulankan u qaban-qaabinay ay tahay in ay jiraan fursado badan oo aan heli karno haddii aan nahay dad fursadahaasi tabaya oo ay ka maqan yihiin, waxaana soo jeedinayaa in midnimadeena ay wadajirkeena ay wax waliba aasaas u yihiin.

Nuur Axmed Maxéd Bicir

Waxaan rajeynayaa in kulankeenu uusan noqon oo keliya dhoolatus ee uu noqdo, mid aan ku kala faaídeysaneyno. Haddii maanta ay fursadu inoo saamaxday in aan joogno wadan nabad ah oo aanu heli karno fursado badan ma ahan in aan is dhigano, ee waa in aan isu dhiiragelinaa wanaaga iyo fursadaha waxbarashada ee wadankan yaalaa. Qof kasta ee u baahan inuu mihnadiisa saxaafadda halkan ka sii wato wuxuu heli karaa fursado waxbarasho waana marka aan annagu isku xirnaano, oo aan wax sameysano, waxa aan sameysaneynana ay noqdaan wax aan sharci u marno``

Cabdiraxmaan Gentelman. (Qaban-qaabiyaha kulanka)

``Isu imaatinkeenan waa bilow fiican, waana in aan maskaxda gelinaa in aan wax badan qaban karno haddii aan nahay dad wada socdo, oo hadafkooda mid yahay. Waxaa wadanka ku sugan asxaab badan oo weriyeyaal ah oo aanan weli sharci helin, ama si uun u dhibaateysan, waxaana soo jeedinayaa in qodobada aan soo saareyno aan ku darno guddi soo uruuriyo weriyeyaasha aan halkan ku joogno, si kulanka midka xiga uu u noqdo mid intaa ka ballaaran, waxaana

Maxed Cabdi Abunaa

Niyada wanaaga naga muuqda waxaan rajeynayaa inuu noqdo mid lagu gaari karo qodobada aan isla soo qaadnay, wax kastaba maalin bey bilowdaan waxaa suurtagal ah haddii wax wanaagsan aanu qabano inteenan, in wanaagaasi ay waxtarka u yeeshaan weriyayaal Soomaaliyeed oo maanta aan madasha joogin. Wadankan waxaan joogay muddo ka badan 10 sano waxaana la soo shaqeeyey ilaa haddana aan la shaqeeyaa hayádo badan oo saxaafadeed wax kasta oo aad sameyneyso marka aad sharci u martid, saxaafaduna ay isku xiran tahay waxaa hubaal ah in annagu aan wax qabsano iska daaye xittaa u qaban karno suxifiyiinta wadanka ku sugan, waxaana rajeynayaa in waxqabadkeenu noqdo mid (Practically) ah Insha ALLAAH``

Maxed Axmed Sandiir (Qadka taleefanka)

Kulan kasta ee dhaca waxaa lagu qiimeeyaa wax-qabad, iyo muxuu kulankaasi soo kordhiyey.? Waxa ugu weyn ee maanta halkan laga kororsaday waxey tahay shaqsiyaad badan oo ay waqti hore isugu danbeysay balse fursadu u saamixi weysay in ay kulmaan oo is arkay, tan labaad ee rajeynayo in laga faaíiday waxey tahay in aan horay u socono oo saxaafadduna ay isla xiriirto, oo qof kasta oo halkan joogo aan la socono xaaladiisa iyo halka ay wax u marayaan.

Farxiyo Sabaax

``Waxey ii tahay farxad in aan arko wejiyo ay mar hore iigu danbeysay, iyo kuwa aan magacooda un dhegaha ka maqlay, waxaan filayaa in ay baahi weyn inoo hayso haddii aan nahay weriyeyaasha ku sugan Nederland in aan qabsano kulan weyne midkan ka ballaaran oo ay ka soo qeybgalaan dhammaan walaalaha innaga maqan oo markaa innaga oo gacmaha is haysana aan isweydiino horta innagu maxaan maanta kororsan karnaa maadaama aan halkan fursado badan ka heli karno.? waxaa wanaagsan in qof kastaba uu qofka kale xiriiriyo, wanaagana dad un baa bilaaba waxaan rajeynayaa wiilasha iyo gabdhaha kulankan maanta isugu yimid in ay aasaas u noqdaan geed weyn oo ay harsan doonaan suxufiyiintii horay u joogtay Nederland, kuwa dhowaan soo gaaray iyo kuwa ay dhici karto in ay mustaqbalka soo gaaraan Insha ALLAAH.

Shukri Shuuto

"Ma jirto qof keligii wax noqon kara, ama koox keligeed wax qaban karta, wadajirku waa lagama maarmaan, waxaana rajeynayaa in haddii maanta aynu Yurub nimid in wax badan ay inoo kordheen, qofku meesha ay wax ugu kordhi karaan ma ahan iskuul oo keliya, ee marka aan nimid Yurub waxaan aragnay wax ka badalan wixii aan wadankeenii hooyo ku soo aragnay waxaasina wax wanaagsan iyo wax xun intaba waa isugu jiraan, waxyaabaha aan fahanay waxaa ka mid ah in maanta annaga oo halkan joogna haddii aan nahay dad isku xiran in aan wax badan qabsan karno, oo qof kasta oo innaga mid ah ee ku haminaya inuu ku sii shaqeysto saxaafadda inuu heli karo waxbarasho dhammeystiran, waana tan ugu muhiimsan ee haddii kulamadani sii socdaan aan kaga faaídeysan karno, haddiise aan ka dhammaan weyno dhaqamadii looga bartay hogaamiye koooxeedyada oo muddooyinkan danbe saxaafadda lagu arkay, ee wax kala jiidashada aheyd, haddii-ba aan nimid waa in aan wax qabanaa, waxqabashadeenuna ay noqotaa innaga wax kororsana iyo innaga oo gacan biniáadanimo u fidina walaalaheena kale ee ku dhibaateysan wadanka.

Raage Cali dheere

Waa bilow fiican in aan isu imaano, haddana waxaan rajeynayaa in aan horay u sii socono, oo haddii aan maanta halkan joogno aynaan seexan oo aan gadaal fiirino, oo aan niraa, war raggeenii aan isku mihnada aheyn ee weli ku sii shaqeynaya duruufihii adkaa maxaan ku kordhin karnaa.? waana lagama maarmaan ah in kulamada ay wax soo kordhiyaan, waxaana soo jeedinayaa guddiga la magacaabay inuu dhabaha u sii xaaro kulank midkan ka sii weyn oo wejiyada halkan ka maqan aan isu aragno Insha ALLAAH.

Maxéd Cusmaan (Ghadafi) (Qadka taleefanka)

Waxaan ka cudurdaaranayaa in aan idin soo gaari waayey, haddana waxaan 100% taageersanahay isu imaatinkan, waxaana muhiim ah in aan ku dedaalno sidii aan u sii wadan laheyn mihnadeena, innaga oo faaidooyin badan oo dhinaca aqoonta saxaafadda ahna halkan ka heli doona Insha ALLAAH.

Geba-gebadii kulanka waxaa la isku raacay in la magacaabo Guddi soo iclaamiya qabsoomida kulankan midka xiga, isuguna yeera dhammaan weriyeyaasha, waxaana guddigaasi magacyadooda ay yihiin sidatan:-

Daahir Cabdulle Calasow

Saalax Xassan Cumar (Saalax dheere)

Maxéd Cusmaan Sheekh (Ghadafi)

Fardowsa Maxed Cabdulle (Fardowsa Tina)

Shukri Macalin Cabdiraxmaan (Shuuto)

Farxiyo Maxed Maxúud Sabaax

W/Q. Cabdishakuur Cilmi Xassan
E-mail. cabdishakuur48@live.com

News Update in English www.dayniileone.com
   Halkaan ka iibso waxii aad u bahan tahay oo raqiis ah
Home of the Web's Best Freebies.